Што е и тромб и што го предизвикува?

Крвните згрутчувања се јавуваат во телото многу пати во текот на животот. При сечење со нож или при хируршка интервенција крвта околу раната почнува да се згрутчува за да спречи понатамошно течење се додека кожата не се регенерира.

Но, како и многу други телесни функции, до згрутчување може да дојде и во непредвидени ситуации и тогаш може да биде опасно по живот.

Постојат различни видови на тромб:

  • Длабока венска тромбоза

Еден од најопасните типови на згрутчување на крвта е длабоката венска тромбоза, која се формира на една од најголемите вени во телото, најчесто во долниот дел на ногата. Симптомите се отекување на нозете, губење на природната боја на кожата, чувство на топлина во тој дел од телото, чувствителност или силна болка. Некои лица, пак, немаат никакви симптоми на длабока венска тромбоза.

  • Белодробна емболија

Белодробната емболија се појавува кога се формира грутка или почесто кога патува до артериите во белите дробови. Овој тип на згрутчување е екстремно опасно, бидејќи го блокира дотокот на крв во белите дробови. Многу лица умираат од белодорбна емболија, дури и во случаи кога грутката првобитно се јавила во некој друг дел од телото. Доколку забележите дека дишењето ви е плитко, имате болки во градите, искашлувате крв и чувствувате слабост и вртоглавица, итно побарајте лекарска помош.

  • Срцев удар

Крвната грутка може да се формира и во срцето или да дојде до него од некој друг дел од телото, блокирајќи го протокот на крв и да доведе до срцев удар. Во тој случај, многу симптоми се слични како при белодробната емболија. Пациентот чувствува силна болка во градите која се шири на рацете, грбот, вратот или вилицата, чувствува дека дишењето му е плитко и е во општа слабост.

  • Мозочен удар

Згрутчувањето кое го блокира протокот на крв до мозокот може да доведе до мозочен удар дури и кај здрави лица. Таквото згрутчување може да се јави по повреда на главата, како потрес на мозокот или поради масни наслаги на ѕидовите на крвните садови. Симптомите вклучуваат отежнат говор, главоболка, парализа, вртоглавица или напади слични на епилептични.

Што предизвикува појава на тромб?

Крвните згрутчувања најчесто се јавуваат по некоја повреда, но крвта може да се згрутчи и заради други фактори.

  • Бременост – Кај идните мајки се зголемува волуменот на крвта, што доведува до поголем ризик од појава на тромб.
  • Дебелина – Вишокот телесна тежина го успорува протокот на крв во вените.
  • Пушење – Пушењето ги оштетува внатрешните ѕидови на крвните садови и ја зголемува шансата тромбоцитите да се слепуваат.
  • Карцином – Лицата кои се лекуваат од рак се во зголемен ризик од крвно згрутчување, поради последиците што хемотерапијата ги остава на телото.
  • Неподвижност – Многу луѓе развиваат крвни грутки по долг период на мирување, бидејќи во случај на неподвижност, срцето потешко пумпа крв низ нозете.

Како да се спречи?

Пред се, треба да се движите. Ако работите канцелариска работа или сте возач, треба да правите пауза на секој час или два, за да прошетате и да ги протегнете нозете. Редовното вежбање и одржување на здрава телесна тежина е клучно за појавата на тромб.