Отокот, болката и вкочанетоста на зглобовите во колената се многу непријатна појава и се главните симптоми кои укажуваат на воспалителен процес во пределот на зглобот или таканаречен артритис.
Коленото е сочинето од три основни дела, на делот каде што коските се среќаваат секоја од нив треба да е прекриена со заштитен слој од рскавица. Дополнителен дел од рскавицата наречен менискус дополнително му дава поддршка на коленото.
Доколку рскавицата се оштети и се случи коските да почнат да се допираат една со друга доаѓа до појава на силна болка.
Коленото секојдневно се троши бидејќи е изложено на доста напор, и затоа многу често доаѓа до појава на артритис.
Постојат неколку различни вида на артритис кои можат да го зафатат коленото, и изборот на терапија зависи токму од видот.
Најчестите видови на артритис кои го зафаќаат коленото се:
Остеоартритис – ова е најчестиот вид артритис кој се случува кога заштитната рскавица врз коските ќе почне да се троши, и ќе предизвика да дојде до меѓусебно триење на незаштитените коски.
На крајот од коските поради тоа можат да се појават и мали израстоци кои не само што предизвикуваат болка туку почнуваат да го ограничуваат и движењето.
Посттрауматски артритис – се јавува како резултат на некоја стара повреда на коленото или на околните ткива. Најчесто овој тип на артритис е пратен и со болен оток во зглобот.
Гихт – тип на атритис кој е предизвикан од наталожување на кристали на урична киселина во зглобот, кои како ситни иглички можат да предизвикаат болка, воспаление и оток.
Ревматиден артритис – автоимун тип на болест каде воспалението во зглобот е предизвикано како резултат на напад од имуниот систем врз сопствените клетки. Поради овој процес можно е да дојде до оштетување на рскавицата и на зглобот, отекување и омекнување на коските во коленото.
Кога артритис ќе се развие во коленото, вообичаено е да се влошува со тек на времето.
Последните фази веќе водат до деформирање на зглобовите и зацврстување што почнува да го отежнува движењето. Но, постојат и случаи каде одеднаш може да се јават посилни симптоми.
Дијагнозата за артритисот во коленото се поставува врз база на физички преглед, снимања и лабораториски тестови. Поставувањето на точна дијагноза е од исклучителна важност за избирање на ефикасен третман.