Хемороидите се отечени вени кои се наоѓаат во анусот и во долниот дел на ректумот, и се појава слична на варикозните вени. Тие можат да се создадат во внатрешниот дел на ректумот и тогаш се нарекуваат внатрешни хемороиди, или да се создадат под кожата околу анусот и тогаш станува збор за надворешни хемороиди.
Хемороидите се многу честа појава, се појавуваат од време на време кај поголемиот дел од луѓето, поради различни причини, а понекогаш причината за нивното појавување знае да биде и непозната.
Знаците и симптомите зависат од типот на хемороидите.
Во случај на надворешни хемороиди симптомите се следни:
- Чешање или иритација во пределот на анусот
- Болка или нелагодност
- Отекување околу анусот
- Крварење
Внатрешните хемороиди се наоѓаат внатре во ректумот. Тие ретко предизвикуваат нелагодност и најчесто не можат ниту да се видат. Најчестите симптоми и проблеми се појавуваат при дефекацијата.
Симптомите при внатрешни хемороиди се следниве:
- Крварење при дефекација кое не е пратено со болка и се забележува како светло црвена крв во тоалетот или на тоалетната хартија.
- Болка и иритација кога внатрешниот хемороид излегува низ аналниот отвор.
Компликациите од хемороидите се ретки, но сепак може да се случат и тоа најчесто се:
- Анемија – иако ретко, хемороидите може да бидат причина за хронична загуба на крвта и намалувајќи го на тој начин бројот на црвените крвни клетки да предизвикаат анемија.
- Задушен хемороид – ако дојде до прекинување на снабдувањето со крв на некој внатрешен хемороид, хемороидот може да се задуши и да предизвика екстремно силна болка.
- Тромб – понекогаш тромбови може да се формираат и во хемороидите, и иако ваквиот тромб не е опасен тој сепак може да предизвика силна болка и да е потребно да се извади.
Проблемите со хемороидите најчесто се третираат во домашни услови со промена на животниот стил и употреба на различни препарати, но во некои случаи потребно е да се посети и доктор.
Посета на лекар се советува во случај кога постои крварење за време на празнењето на цревата или кога проблемот не се подобрува по една недела од домашното третирање.